UPV/EHUko Artearen Historia eta Musika Saileko ikerketa taldea da. Honek bi diziplinatan diharduten ikerlariak batzen ditu: artearen historian ikerketa-ibilbidea egindakoak, batetik, eta literatur kritikan dihardutenak, bestetik. Taldeko ikerlari guztien lanaren ezaugarri komuna da teoria, kritika eta historia feminista ikerketarako oinarri eta tresna gisa erabiltzea, eta ikuspegi feministari eskainitako lehentasunezko lekua. Era berean, Euskal Herriko arte-praktikak eta euskaraz sortutako literatura dira ikerketa-taldearen beste batasun haria, orain arteko ibilbidean horixe izan baitute aztergai nagusiki, eta taldearen asmo nagusia ere euskal literatura eta ikusizko arteak ikuspegi feministatik aztertzea baita.

Helburu nagusiak bi dira: lehendabizi, Euskal Herriko arte garaikidearen eta literatura garaikidearen historiografia ikuspegi feministatik berrikustea. Orain arteko kultur sorkuntzen gaineko historiaren izaera androzentrikoa aintzat harturik, talde honek errelatu nagusi horiek zalantzan jarri eta bestelako diskurtsoak sortzea du xede. Bigarrenik, ikusizko arteetan zein literaturan azken hamarkadetan garatutako sorkuntzaren genealogia berriak proposatzea, ikusgarritasuna emanez ezkutuan geratu diren emakumezko sortzaileei, eta bestelako ardatz tematiko eta metodologikoak proposatuz arte garaikideak historizatzeko.